१ पुष २०८१ । ताप्लेजुङको फुङलिङमा आगलागी हुँदा एक घर जलेर नष्ट भएको छ । गएराति १० बजे ताप्लेजुङ फुङलिङ– ६ गुम्बाडाँडामा महेन्द्र गुरुङ (हाल धरान बसोबास गर्ने) को घरमा टिकामाया गुरुङ डेरा गरी बस्दै आएकोमा घरमा कोही नभएको बेला एक्कासि बिद्युत सर्ट भई आगलागी भएको थियो ।
आगलागीबाट ढुङ्गा माटोले बनेको टिनको छानो भएको तीनतले घर पूर्णरुपमा जलेर नष्ट भएको छ । त्यस्तै घरभित्र भएका कुखुरा २० वटा, मकै ४ मुरी, आलु ४ मुरी, टीभी , डिसहोम जलेको प्रहरीले जनाएको छ ।
जिल्ला प्रहरी कार्यालय ताप्लेजुङबाट खटिएको प्रहरी टोली र स्थानीयको सहयोगमा राति १२ बजे आगलागी पूर्णरुपमा नियन्त्रणमा आएको थियो ।
