ललितपुर, २ कार्तिक २०८१ । साफ महिला च्याम्पियनसिप फुटबलमा श्रीलंकाले माल्दिभ्सलाई हराएको छ। त्रिपुरेश्वरस्थित दशरथ रंगशालामा शुक्रबार सम्पन्न पहिलो खेलमा श्रीलंकाले माल्दिभ्सलाई १–० ले हराएको हो।
श्रीलंकाको जितमा खेलको १७ औं मिनेटमा इमेशा वार्नाकलासुरियाले निर्णायक गोल गरिन् । दायाँ विंगबाट प्रविना परेराले दिएको क्रसमा इमेशाले हेडरमार्फत गोल गरिन्। राष्ट्रिय टिमबाट डेब्यु गरेको खेलमै उनले गोल गरेकी थिइन्।
श्रीलंकाले पहिलो र दोस्रो हाफमा एकपछि अर्को गोल गर्ने अवसर बनाए पनि गोल हुन सकेन। माल्दिभ्सकी गोलरक्षक अमिनाथ लिजाले केही उत्कृष्ट बचाउ गर्दै गोलस्कोर बढ्नबाट जोगाएकी थिइन्।
समूह बि मा रहेको श्रीलंकाले जितसँगै ३ अंक जोडेको छ। माल्दिभ्सले पहिलो खेल गुमाएसँगै सेमिफाइनलमा पुग्न दबाब थपिएको छ । समूह बिमा नेपाल र भुटान पनि रहेका छन् । यी दुई टोलीबीचको खेल साँझ साढे ५ बजे दशरथ रंगशालामै हुनेछ।
