काठमाडौँ, २ असोज २०८१ । निर्वाचन आयोगले १६ मंसिरमा हुने स्थानीय तह उपनिर्वाचनको कार्यतालिका स्वीकृत गरेको छ ।
आयोगका प्रवक्ता नारायणप्रसाद सापकोटाका अनुसार स्थानीय तह उपनिर्वाचन प्रयोजनका लागि असोज १० देखि १६ गतेसम्म दल दर्ताको समय दिइएको छ ।
त्यस्तै २० असोजमा दल दर्ता स्वीकृत गर्ने, कात्तिक २६ गते मतदाताको अन्तिम नामावली प्रकाशन गर्ने, ३० कात्तिकमा निर्वाचन अधिकृतको कार्यालय स्थापना गर्ने र २ मंसिरदेखि निर्वाचन कार्यक्रम सञ्चालन गर्ने आयोगको कार्यतालिका छ । त्यसपछि १६ मंसिरमा निर्वाचन हुनेछ ।
आयोगका अनुसार २०८१ मंसिर १५ गतेसम्म १८ वर्ष पूरा हुनेले स्थानीय तह उपनिर्वाचनमा मतदान गर्न सक्नेछन् ।
‘मतदाता नामावली अद्यावधिक गर्ने सन्दर्भमा २०८१/०५/३१ सम्म देशभरबाट सङ्कलित तथा २०८१/०८/१५ गतेसम्म १८ वर्ष उमेर पूरा हुने मतदाताको विवरणलाई अद्यावधिक प्रकृयामा लगिने छ’, प्रवक्ता सापकोटाले विज्ञप्तिमा भनेका छन् ।
आयोगले मतदाता नामावलीको अन्तिम विवरण असोज १८ गते प्रकाशन गर्नेछ । असोज १८ देखि ३० गतेसम्म त्रुटि सच्याउन निवेदन दिने र झुटा विवरण पेश गरी नाम लेखाएको भए उजुरी दिन सकिने आयोगले जनाएको छ ।
मतदाता नामावली अद्यावधिक प्रक्रिया पूरा गरी अन्तिम मतदाता नामावली कात्तिक २६ गते प्रकाशित हुनेछ ।
